1987. urtea amaitzear zegoela, musika talde bat osatzeko asmoarekin elkartu ginen lau lagun: Aitor Gorosabel, Asier Osoro, Xabier Bastida eta Borxa Arrillaga. Tresna bat jotzen genuen lehen aldia izan  arren, musika egiteko gogo handia genuen. Eibartarrak gera laurok. Eibar Euskal Herrian dagoen  hiri industriala da. Txiki-txikitatik gara lagunak, eta gauza askok elkartzen  gaitu, besteak beste, elkarrekin musika proiektu  bat sortzeko eta bizitzeko gogoak. Proiektu honi Su Ta Gar izena eman genion, jendaurrean lehen aldiz jo (1988-8-14) baino astebete lehenago.

Lehenengo grabaketa gure kontura egin genuen, 1989ko maiatzean, Eibarko lagun batzuen lokalean. Maketa honek arrakasta izan zuela eta, beste maketa bat  grabatzeko aukera eman zigun urte bereko abuztuan, baina estudio profesional batean. Bigarren grabaketa, lehen albumerako bidean aurreneko pausoa izan zen. Tarte horretan, Mikel Laboaren ‘Haika Mutil‘ kantaren bertsioa egin genuen eta Laboaren omenezko ‘Txerokee‘ diskoan argitaratu zen. 1990. urtean, Estigia taldearekin batera, Villa de Bilbao lehiaketan lehenengo saria irabazi genuen. Sariak Estigiakoekin disko bat grabatzeko aukera ematen zigun, baina aukera hau baztertu egin genuen, horrela, 1990eko azaroan ‘Jaiotze Basatia‘ grabatu genuen IZ estudioan. Teknikaria Kaki Arkarazok izan zen, eta 1991ko martxoan argitaratu genuen Zarata disketxearen babesean. Diskoa batik bat Euskal Herrian aurkeztu genuen arren, urte bereko urrian Alemania, Suitza eta Austriara joan ginen squatetan kontzertuak ematera...

1992. urteko apirilean, ‘Hortzak Estuturik‘ grabatu genuen IZ estudioan. Kaki aritu zen beste behin ere teknikari, baina oraingo honetan Esan Ozenki zigilu berriaren babesean. Diskoa urte bereko ekainean argitaratu zen. Euskal Herri osoan aurkeztu ondoren, 1993ko hasieran Espainian zehar ibili ginen aurkezten. Euskal Herrian eta Espainian aurkeztu ondoren, apirilean, Europan zehar bira egin genuen EH Sukarra taldearekin batera. Bira honen bukaera bezala, kontzertu berezia eman genuen Eibarren. Kontzertua bideoan grabatu eta argitaratu genuen ‘More Volumen Tour‘ eta ‘Su Ta Gar zuzenean‘ izenarekin.

1993ko irailean, material berria eskuetan hartuta, Lorentzo Recordsera jo genuen disko berria grabatzera. Aitor Ariño aritu zen teknikari, eta abenduaren hasieran kaleratu genuen aurreko diskoaren zigilu berarekin. ‘Munstro Hilak‘ Euskal Herrian zehar aurkeztu eta gero, Espainia eta Frantzian aurkeztu genuen, 1994ko urtarrila eta otsailean, eta 1995 urtearen hasieran Italia, Austria eta Alemaniara joan ginen berriro.

Ostera beste disko bat grabatzekotan ginenean, Borxak istripua izan zuen 1995ko maiatzean eta gertaera hark asmo guztiak aldarazi zizkigun. Borxaren anaia, Galder, hasi zen bateria jotzen, eta ‘Sentimenak Jarraituz‘ diskoa grabatu genuen, aurreko produkzio berarekin. 1996ko maiatzean argitaratu genuen, eta lehengo aldiz bideo klip bat atera genuen albumari izena ematen dion kantuarekin. Bideo klipak sari bat baino gehiago irabazi zuen hainbat bideo lehiaketatan.

Aurreko diskoa Espainia eta Frantziako hainbat hiritan aurkeztu ondoren, bateri jolez aldatu genuen berriro. Iban Zugarramurdik hartu zuen Galder Arrillagaren tokia. Bateri jole berriarekin grabatu genuen, 1997ko iraila eta urria artean, ‘Agur Jauna Gizon Txuriari‘ eta urte hartako azaroan Kubara joan ginen aurkeztera. Abendutik aurrera Euskal Herrian, eta 1998ko otsailean Espainian aurkeztu genuen lan hau.

Gure jarraitzaileen eskaerei erantzunez, 1999. urteko ekainean 'Su Ta Gar 1987-89' lehengo bi maketen edizio berezia argitaratu genuen, Gaztelupeko Hotsak disketxearekin. Bertan, garai hartako abestiez gain, PCrako egokituriko 'Jo Ta Ke' abestiaren bideoa dago.

Maketen edizio bereziaren produkzioa amaitu eta gero, disko berria grabatzen hasi ginen, orain ere Berrizko Lorentzo Records estudioan. 1999ko uztaila eta iraila artean grabatu eta nahastu ondoren, azaroaren 8an kaleratu zen GOR disketxearen eskutik, gure azken ekoizpena: 'Homo_Sapiens?'. Urte honen amaiera eta 2000. urtearen hasiera artean 'Homo_Sapiens? Tour'00' aurkezpen bira egin genuen, izugarrizko muntai berezia erabiliz. Bira honek zailtasun tekniko eta produkzio kostu handiak zituela eta, Euskal Herrian zehar bakarrik egin ahal izan genuen. Horregatik, bira honetako azken kontzertua, Iholdin emana, bideoan grabatu genuen, aurrerago, gure zuzeneko bigarren bideoa izango dena, gure jarraitzaile guztiek ezagutu dezaten.

Horrela, 2000. urtearen ekainean 'Homo_Sapiens? Tour'00' bideoa argitaratzen da GOR Diskak zigiluaren babesean. 

2000. irailaren azken egunetan Judas Priest taldearen 'The sentinel' abestiaren bertsioa grabatu eta nahastu genuen Berrizko Lorentzo Records estudioan. Abesti hau Judas Priest taldearen omenezko 'Metal Gods' izeneko diskoan argitaratu genuen Zero diskaetxearen babesean, 2000. urtearen azaroan. Disko honetan gure bertsioaz gain µLT, Berri Txarrak, Hamlet, Ktulu edo Baron Rojo bezalako taldeen bertsioak aurkitzen dira. 

2001ko apirilaren 17an kaleratu genuen gure zuzeneko lehenengo diska, 'Su Ta Gar Jo Ta Ke' izenburupean eta Gor Diskak disketxearen babesean. Garai guztietako 23 abestiez osaturiko lan bikoitz honek CD formatuan PCrako egokituriko bi abestien bideo klipak ditu, 'Su Ta Gar 1987-89' maketen edizio berezian egin genuen bezala. Lan honetan 2000.ko bukaeran emandako lau kontzertuen grabaketa eta lan askoren emaitza biltzen dira.

'Su Ta Gar Jo Ta Ke' diskaren zuzeneko aurkezpenak prestatzen ari ginela baterijole aldaketa ematen da taldean berriro. Oraingoan ere Galder Arrillaga, Borxaren anaiak, hartzen du bigarren aldiz azken urteetan Iban Zugarramurdik betetzen zuen tokia.

2001.ko abenduaren 3an aurkeztu zen Gasteizko Gaztetxearen aldeko 'Gaztetxeak martxan' CDa, bertan, Euskal Herriko talde desberdinen abestien artean, gure 'Gaztea' abesti berria aurkitzen da. Abesti hau urriaren 11 eta 12 bitartean Arrasateko Shot estudioan grabatu genuen.

Gaur arte 550 ekitaldi baino gehiago eman ditugu zuzenean, eta euren artean estilo desberdina duten talderekin jo dugu. Besteak beste, Platero y Tu, Gun, Saxon, La Polla, Mano Negra, Def Con Dos, Siniestro Total, Soníc Youlth, Ratos De Porao, Barricada,  Tahures Zurdos, S.A., e.a. Euskaraz abesten duten taldeei dagokienez, esan daiteke ia guztiekin jo dugula. Batzuk aipatzekotan Oskorri,  Hertzainak, Negu Gorriak, Lin Ton Taun, E.H. Sukarra, Delirium Tremens, Etsaiak, Tapia eta Leturia Band...