Taldea 1999 urtearen hasieran sortu zen, hasiera baten denbora pasatzeko asmoarekin. Eneko, Mikel eta Etxe batzen ginen eta ahal genuen moduan abesti batzuk jotzen genituen. Denborarekin gure abesti propioak egiten hasi ginen eta musika taldearen ideia barneratzen hasi ginen.

Hortik urte batera lehenengo kontzertua eskaintzeko aukera eman zigun Berrizko gaztetxeak Legaño auzoko jaietan, eta beste taldekide baten beharrean aurkitzen ginan. Unai gurekin batera ari zen gitarrako klaseetan eta gurekin jotzeko proposamena egin genion. Berak baiezkoa eman zigun eta hiru edo lau aldiz ensaiatu ostean lehenengo kontzertua eman genuen. Laukote bihurtu ginen eta kontzertuak ematen hasi.

Nahiz eta hasierako kantek ez izan Heavy Metalarekin zerikusirik, pixkanaka kantuak hobeak izaten hasi ziren, eta gero eta gehiago gustatzen zitzaigun egiten genuena. Kanta bat atera eta hori bihurtzen zen ia onena. Eta horrela gu ia konturatu gabe, heavy metalera urbiltzen joan ginen eta barne barnerarte sartu. Gaur egun estilo hau da guk jo nahi duguna eta ildo beretik jarraitzeko asmoarekin gaude. Erreferentzitzat hartuta JUDAS PRIEST, PRIMAL FEAR, MANOWAR eta SUTAGAR bezalako taldeak ditugu gustokoen, besteak beste. Gustoko dogun estiloa da eta gustora gagoz egiten dogun lanarekin. Kontzertuei dagokienez dena ematera irtetzen gara eszenatoki gainera ikusleek guk bezala gozatu dezaten gure musikaz, eta gainera zenbat eta kontzertu gehiago eman orduan eta gustorago sentitzen gara gure buruekin eta egiten dugunarekin.

Gure lehenengo maketa argitaratu genuen 2003. urteko urrian eta 350 aletik gora saldu ditugu. Oso harrera ona izan du gure jarraitzaileengan eta baita maketa aurretik ezagutzen ez gintuen jendearengan.

Maketa sei kantuz osatuta dago, eta aipatu beharra dago luxuzko bi laguntza izan ditugula. Alde batetik, euskal heavyak duen abeslari onena, Ibai Marin Hira taldeko abeslaria, “Nabari” izena duen kantuan koroak eginez, eta bestetik Seiurte taldeko gitarjole bikaina den Iñaki Elortza “Zu ere” kantuan punteo bikaina sartuz.

30 kontzertutik gora jo ditugu jadanik eta beste horrenbeste jotzeko desiatzen gaude. Espero dugu hemendik aurrera egindako bideari jarraipen ona ematea eta azken urteetan ikasitakoa praktikan ezarri eta aurrerantzean gure lekua izatea Euskal Herriko eszena metalikoan.