ROCK/METAL

Ez da ohikoa honelako maketekin topo egitea. Ez da ohikoa sei abestitan ezinezkoak ziren erantzunak aurkitzea. Egia esan, gurean ez dugu ohiturarik “ezusteko” musikaletan sinisteko. Munduan ere halako zerbait gertatzen da. Alabaina, Instep taldeak jakin du. Asmatu du abesti sorta bat bildu eta harridura sortzen. Horretarako sei kide nahastu behar izan ditu. Metala, rocka eta hip-hop doinuekin egin duen bezala.

Emaitzari “Frequently Asked Questions” izena jarri diote; izenburu aproposa. Lau urte behar izan dituzte serio jarri eta lehen testigantza aurkezteko. Sei dira emaitzan gustura entzungo ditugun abestiak. Gordinak orokorrean, nahiz eta elementu ezberdinak tartekatu. Gehienetan metal berriaren baitan kokaturiko Dj-aren lan edo sampleak, “Equilibrio” kantuan nabarmen. Nolanahi ere, badira lagungarriak diren djembe eta haizezko instrumentuak. “Loneliness” lasai eta zoragarrian aurkituko ditugu bi gehigarri interesgarri hauek. Honekin batera, baliteke abesti honetan nabaritzea taldearen eragileetako bat: Incubus. Seikotea oldarkorragoa da, ordea.

Abestiak eleanitzak izateak ere badu bere berezitasuna. Euskara, gaztelera eta ingelesa nahasi dituzte. Honekin ere asmatu dute. Baina kontuz, Instep taldeak ez du orijinaltasunaren giltza. Soilik jakin dute Euskal Herrian horrenbeste landu ez den metal berriarekin urrats fresko bat ematen.

Bere garaian Evirus69, Spezial Guest edo RaizDx taldeek eman zuten bezala. Orain, lehen diskoa gertu dute Donostiako Piraten musika lehiaketa irabazi ondoren. Gainontzeko erantzunak ordurako utziko ditugu nahiz eta jakin badakigun Oiartzungo taldeak norabide rock zaleago bat hartu duela.
 

Inaxio Esnaola (3,5/5)