|
Nafarroako rock gogorraren eszena osasuntsu dago. Hotz laukotea
genuke azken eredua. Duela hiru urte atera zuten maketarekin ezer gutxi
erakutsi bazuten ere, “Hombre Contra Mente” bigarrenarekin
bete-betean asmatu dute. Nabari da urteak pasa direla eta Lizarrakoek
beraien eragin guztiak sailkatu ondoren norabide bat hartzeko gai izan
direla. Maketa berriko bost kantuetan antzeko ezaugarriak topatuko
ditugu. Letra zorrotzak, oinarri musikal bortitza, gitarra solo
kaotikoak eta bikain eraikitako lelo zein melodiak. Hau guztia thrash
metala eta rock indartsua oinarri hartuta.
Dena dela, abesti bakoitzak du bere berezitasuna. Esaterako, “Perros de
Partido” abestian Koma bizilagunen eragina konfirmatzen hasten gara. Hau
gutxi balitz, pentsa, kanta berean Brigi Duqueren parte hartzea
azpimarratu beharko genuke. Familian, beraz. Beste kolaboraziorik ere
bada, barregarriagoa. Baina honakoa norberak deskubritu beharko du.
Gainontzean, “Cuantas Mujeres” kantuan tratu txarren gaia gordintasunez
tratatzen dute, “Mierda” abesti azkar eta basatian gustura geratzen dira
thrash eta hardcore arteko zaporearekin, eta “Juego Sucio” abestian
errepaso ederra ematen diote egoera politikoari.
Finean, maketako bost abestiek merezi dute aipamena duten kalitate eta
ekoizpen landuagatik. Lastima lehenengo maketan nagusi zen euskara utzi
eta gaztelerara pasa izana. Alabaina, aldaketa ez da batere txarra izan
musikalki eta talde bezala bederen hobera egin dutelako. Hotz taldearen
thrash’n’roll bizia entzun nahi duenak maketa osoa jaitsi dezake beraien
web orritik. Segi ba!
|
