HARD ROCK 70'S

Benetan bitxia da musika mundua. Supertrooper taldeko kideek ondotxo dakite hori. Lau urtez Black Diamond izena eta atera zuten maketa oholtza ezberdinetatik oihartzunik gabe paseatu ondoren, aurten izena aldatzea erabaki eta txanponaren beste aldea ezagutu dute. Ulertzeko zaila. Taldearen egitura ez dute aldatu. Oraindik, 70. hamarkadako hard rocka atsegin dute eta konposaketak iraganeko ildo beretik doaz. Izen aldaketa izango ote da misterio honen gakoa?

Kontuak kontu, Donostian finkatutako seikote gipuzkoarrak urte bikaina darama. Atarrabiako Pop Rock lehiaketa irabazi, Donostiako Piraten I. Musika Lehiaketaren finalera iritsi eta duela gutxi maketa interesgarri bat atera dute. Badirudi zorte txarra atzean utzi eta “A Big Band” gisa aurrera egiteko gogotsu daudela. Hain zuzen ere, halaxe izendatu dute Supertrooper taldekoek beraien lehenengo lana. Bertan ingelesez abesturiko bost kantu rockzale topatuko ditugu, beraien hitzetan Kiss (zuzeneko itxurengatik bai bederen) eta Mc5 taldeen espiritua gordetzen dutenak. Dena dela, Gigi eta Sararen ahotsek soularen esentzia gaineratzen diote emaitza bihurri eta bikaina erdietsiz.

“Soul Time” eta “Anyway” lirateke bi eredu on. Baina baita “Black Diamond” nostalgikoa ere. Hala ere, maketako bost abestiek merezi dute eta ongi islatu taldearen izaera. Soinu aldetik ere kexatzeko gutxi dute nahiz eta gitarren soinu heavya dela eta zenbait iritzi jaso. Egia esan, zuzenekoetan gitarrek rockaren izerdia nahiago dute eta halaxe erakusten dute. Finean, honako maketa bai feelingaren diamante puska eta pausu rock zale bezain interesgarria!
 

Inaxio Esnaola (4/5)