HEAVY METAL

Iragan maiatzean kaleratutako lana dugu hau. Egileak The Howl bizkaitarrak dira, 2003. urtean Bilbo Handian sortutako taldea. Ibilbide labur honetan, baina, iaz “Emergenza” lehiaketan Euskal Herri mailako irabazle suertatu ziren eta Estatu mailan hirugarren postua eskuratzeko astia izan zuten. 2005. urtearen erdialdean jada, Imanol, Jorge, Iosu, Miriam eta Enekok “2.0” izeneko lehen demoa argitaratu dute.

           Neska-mutil hauek orokorrean heavy metala lantzen dutela esan daiteke; “heavy metal” terminoa ikuspegi zabal, malgu eta garaikide batetik ulertuta. Izan ere, boskotearen maketan sustrai klasikoak mantenduko dira baina aldi berean molde tradizionaletik aldentzen diren ukitu edo zertzelada ezberdinak aurkituko ditugu. Heavy metal klasiko hertsia eta joera berritzaileagoen arteko erdibidean koka ditzakegu, beraz. Ez dute “old school” soinua bilatzen, ezta metal berria edo gaur egun modan dagoen metalcorea jorratzen. Hala ere, heavy metala dela ezin ukatu, XXI. mendeko heavyaren beste aldaera bat, nonbait.

           Demoak dakarrenari erreparatzen hasita, Wellcome To The Howl intro hutsalaren ondoren From Hell-ek irekiko du benetan lana. Gitarra riff zorrotz artean “Ripper” Owens garaiko Judas Priest gogoratu dezaketen goranzko doinu batzuek abiatuko dute lehenbiziko abestia. Erritmoa une batez pausatu eta Miriam abeslariaren ahotsa azaleratzen den arte; zimurtzen ez den emakumezko ahots ozena, indartsua eta behar besteko ostia txarra erakusten duena. Hala, minutuak aurrera joango dira zapore garaikidea duten metal riffak alde batetik, eta eragin klasikoa agerian uzten duten gitarra solo artean. Abesti honetan, halaber, Alainek (Zuldar, Bioterror) ekarpen oldarkorra burutuko du, mutilaren eztarri urratu eta sakona Miriamen ahots bikoiztuekin gurutzatzean emaitza indartsu eta erakargarria lortuz.

           Xuxurla eta ahots erregistro leun artean Unfair gozo hasiko da. Aitzitik, istorio itogarria da, egitura musikal trinkoa aurkezten duen abestia. Hori horrela, kantuan zehar badira trinkotasun hori hausteaz arduratuko diren konponketa eta nabardura ezberdinak. Edozein modutan, honelako demoetan ohikoa den ekoizpen eskasak detaile horiek behar bezala antzematea galaraziko du. Ondorioz, 7 minutu luze irauten duen abestiaren entzunaldia errepikakor xamarra suertatu daiteke.

           Far Beyond Metal ez da true metal delakoaren aldarrikapen atzerakoi horietako bat, baizik eta guztiz kontrakoa. Lanaren azken kantua dugu, hasiera-hasieratik erakargarriagoa bihurtzen den pieza. Erritmikoki atseginagoa izateaz gain, Miriamen ahotsa laguntzen duten koruek beste kolore bat emango diote abestiari. Lotsagabekeria, indarra eta harrotasun puntu bat “The Howl” zigilua daraman azken kantua borobiltzeko.

           “2.0” demoaren introa eta ondoren datozen 3 abestiak di-da batean doaz. Hartara, taldearen ideia osatuago bat egiteko gutxienez abesti pare bat gehiago gustura entzungo lirateke. Hori gora-behera, lagin interesagarria da honako hau, izan ere, Euskal Herrian salbuespen den eskaintza dugu aurrean. The Howlen baitan berezko nortasuna garatu duten metal doinuak, emakumezko ahots trebatua eta zuzeneko eraginkor eta kementsua aurkituko ditugu. Ulu berrien zain gelditzen gara.

Unai Santos Amarika (3,75/5)