|
Abesti motzekin, bide luzea egitera iritsi daiteke Infest taldea.
Baionako laukoak lehen diskoarekin harrera ona areagotu du “Moshroom”
bigarrenarekin. Hogei kantu, ordu eta erdian jaso dituzte.
Aitzakiarik ez, zuzen eta zehatz. Bi minutura ozta ozta iristen diren
grind/death kantuekin lan gordina eratu dute.
Abestien hitzek ez dute lekua liburuxkan, baina badira. Askotarikoak,
gainera. Adierazgarriak dira gehienak: “Murphy’s Law”, “20th Century
Fucks”, “Greatest (S)hits” eta “Paberse Matao”. Beste hamar
abesti arrapaladan ere aipa daitezke. Nasum edo Napalm Death talde
handien eragina izanda ere, gai dira entzulea harritzeko, eta dosi
txikietan bada ere tarteka zaplasteko bat emateko. Baita gorra dena
itzartzeko ere. Zuzenean ere efektu bera lortzen dute. Izan ere,
lapurtarrak taula gainean moldatzen dira ondoen. Duela hilabete batzuk
Trintxerpeko Mogambo aretoan eskainitako kontzertua oldarkorra izan zen.
Oholtzaren jaun eta jabe egitearekin batera etenik gabe zarata eskaini
zuten. Teknikoa, bezain zikina eta garbia. Hegoaldean ez ezik,
iparraldean eta munduko hainbat txokotan era makina bat kontzertu
eskaini dituzte. Datorren urtean Suitzako Brutal Grind Assault jaialdian
parte hartuko dute estilo bereko izen handi askorekin batera. Horrez
gain, ezin ahaztu diskoa Eslovakiako Metal Age diskoetxeaekin atera
dutela. Garrantzitsua abesti labur horien oihartzuna luzatzeko.
Nola nahi ere eta nazioartean leku bat egiten ari diren arren, eurek
dioten bezala Euskal Herrikoak dira. Gojira taldearekin batera, Ipar
Euskal Herriko muturreko musikaren erreferentzia dira. |
