|
Hamargarren
urteurrena ospatzeko Numen taldeak gudara joatea erabaki zuen.
Horretarako, taldearen izen berbera duen hirugarren diskoa kaleratu
zuten duela hilabete gutxi. Azkartasunaren eta bortizkeriarekin zentzu
onean obsesionatuta, Arrasateko taldeak bere ibilbideko black metal
disko gordinena osatu du. Hala eta guztiz ere, sustraiak ez dituzte
ahaztu. Aurreko lanetan tarte gehiago zuen folk musikak oraindik badu
bere presentzia. Kristautasunaren kontrako jarrerak bezala. Bigarren hau
nabarmenagoa da.
“Egunsentiaren Heriotza” lehen abestiaren lehen segundoetan
entzuten diren ttuntturroek hasiera berezia ematen diote diskoari. Ardi
larruz jantzitako otsoa. Euskal esentzia duena, baina Eskandinaviako
kutsu black metal zalea. Kantu honekin hasten da Numen taldekoen istorio
kontzeptuala. Gorrotoaren indarra kristautasunaren aurrean. Ondorengo bost
kantuetan ere bortizkeria gupidagabea da nagusi, nahiz eta barealdi akustiko zein epikoek
beren tartea ere izan. Eredu garbiena “Belearen Hegaldiak... Isiltasuna
Dakar” zazpi minututik gorako maisu lanean aurkituko dugu. Gitarra
riff hiltzaile eta Aritz Nabarroren erregistro ezberdinetako ahots
urratuak nabarmendu arren, entzuten diren alboka hotsak ezin dituzte
gainditu. "Isiltasunaren Hots Hutsa" diskoko azken abestian
antzeko ezaugarriak aurkituko ditugu. Tartean zeharkako flautaren ukitu
nostalgikoa eta lan honetan garrantzia duten Eölen garrasi eta aieneak.
Honez gain, folk musika "Gauaren Irrifarre Izkutua" abestiaren
amaiera aberasten duen artean, "Etsipenaren Etsai" eta
"Ahanzturaren Hilbobia" zinez oldarkorrak dira.
Nolanahi ere, akatsak badira disko esanguratsu honetan. Batetik,
ezusteko logo aldaketa (ez dena inolaz ere deigarria), eta bestetik, abestien letrak ez dituzte
besteetan bezala landu. Egia da disko kontzeptual baten aurrean gaudela,
baina antzeko esaldiak abesti guztietan tartekatzea pixka bat eskasa da.
Ekoizpena, aldiz, gustuaren araberakoa da. Azken emaitza aurrekoa baino
zikinagoa den arren, agian hau da Numen taldearen benetako soinua. Honezaz gain, bateri jotzaile bila
jarraitzen dute. Hau joko duenik bada berehalakoan agertu dadila!
|
