EXPERI-METAL

Quaoar 'Man't'

Urtea: 2007 - Diskoetxea: Auto-ekoizpena - Taldekideak: Iñigo (ahotsa), Hugo (gitarra eta koroak), Josu (gitarra), Jauke (baxua) eta Bjorn (bateria) - Ekoizleak: Quaoar eta Beard Studios - Estudioak: Beard Studios (Bilbo) - Abesti kopurua: 7

(08/01/27)

Esateko konplexuak diren izen arraroek ez dute nahitaez gauza konplexu bat gordetzen. Quaoar taldeak, bai. “Man’t” aurreneko diskoa zinez zaila da. Harribitxia. Konplexua. Aberatsa. Ohitura falta dugu gurean horrelako diskoak irenstea tokatzen zaigunean. Boskote bizkaitarrak lehen diskoan bildutakoa arte hutsa da. Puzzle nahasi baten zazpi pieza topatuko ditugu bertan. Aldakorrak, luzeak eta iheskorrak.

Metal musika oinarrian, 90ko grunge musika eta 70ko hasierako rock progresiboa nahasten dituzte. Tool, Opeth, Pearl Jam eta Pink Floyd familia bereko senide gisan. Beraiek halaxe definitzen dute beraien musika eta egileak direnez, ezin ukatu. Entzulea nahasten dute. Diskoa aurkezten duen ia hamar minutuko intro instrumental harrigarriak, “Me Against Me” kantuak bezala eta diskoari izena ematen dion beste zortzi minutuko “Man’t” maisu lanean Quaoar esperimentalenak ageri dira. Kolore ezberdinetako pasarteekin. “JXNS” abesti lasaiagoan Iñigo abeslaria Vedder hobetzen saiatzen da. Mailara iristen da behintzat.

Bestalde, lan osoan zehar izatearen frustrazioaz hitz egiten dute. Eskerrak. Alta, beraien kantu sortak ez du frustrazioa eragiten. Kontrakoa. Baina, kritikoek hitz hutsak idazten dituzte. Ditugu. Zorionez ez dugu belarriekin irakurtzen. Saiatu iragan urteko disko bikain hau gozatzen.

Alde: Detailez beteriko musika eta hamaika eraginekin lortu duten aberastasuna.
Kontra: Horren musika nahasiak entzulearengan eragin dezakeen bat bateko sentsazio ezkorra.

Inaxio Esnaola (7,5/10)