|
Disko bikaina atera du Killers
Baionako talde mitikoak. Beraien estudioko 12. lana da jadanik "A
L'Ombre Des Vautours" izenekoa. 1985. urteaz geroztik dabiltza
diskoak atera eta atera eta esan daiteke Euskal Herriko heavy metal
talderik zaharrenetarikoa dela. Zoritxarrez, beti izan dira nahiko edo
oso ezezagunak nahiz eta disko bikainak kaleratu. Dena den, Europa osoan
zehar badituzte jarraitzaile finak ere, ez dira asko, baina egon badaude
eta hori bada zerbait. Horren froga da Europan zehar egiten diren
jaialdi batzuetara gonbidatuak izan direla urte hauetan zehar (Wacken
edo Keep It True adibidez).
Goazen harira eta sartu gaitezen beraien azken lana aztertzera. Beti
jorratu duten heavy speed metalarekin jarraitzen dute eta disko luze
xamarra atera dute oraingoan, 22 kantuz osatua. Tartean introa eta
pasaje instrumental gutxi batzuk daudelarik. Disko osoan gehien
nabarmentzen dena gitarren riff potente eta melodikoak dira, benetan
bikainak. Produkzioa eta soinua ere ondo zaindu dituzte orokorrean,
bateriarena izan ezik, momentu batzutan bateria astintzen ari dena
pertsona baten ordez "konputagailu" bat dela bait dirudi. Dena den,
abesti ia guztiak benetan latzak dira, tximak astintzeko paregabeak,
"Combien De Fois?" eta "Faire Du Metal" abestiak dira horren adibide
bikainak.
Pena da, oraingo honetan ez dutela euskarazko kanturik sartu, denak
frantsesez grabatu bait dituzte. Diskoaren liburuxkan ere dena
frantsesez dago, beraz kantuak zertaz hitzegiten duten ez dago jakiterik
frantsesa ez baldin badakizu eta interesgarria izango litzateke jakitea,
diskoa kontzeptuala delako. Aipatu baita ere bi bertsio daudela diskoan,
bat Manowar taldearen "Black Wind, Fire And Steel" kantuarena eta bestea
Motorhead taldearen "Overkill"-ena. Bi hauek ere frantsesez abestuak
daude eta beraien estilora eramanaz, kurioso eta ongi gelditzen dira.
Laburbilduz eta hizkuntzaren gaia albo batetara utziaz, heavy metala
atsegin duen orok entzun beharko lukeen diskoa dela esan daiteke,
benetan gomendagarria. On egin dizuela!
|
