|
Euskal death melodikoaren uzta oparoaren beste fruitu bat dugu
Darkness By Oath arrasatearrek iaz argitaratutako Confidential
World Of Lies, euren estraineko lana. 90. hamarkadaren hasiera
aldera death metal suediarraren bigarren adarrean (Gotebörg soinuan,
alegia) oinarriturik bederatzi kantuz osaturiko diska eskaintzen digu
boskote honek. Eragin moduan taldeak aipatzekotan, beraz, At the
Gates edota Dark Tranquillity-ren hastapenak bezalakoak aipa
daitezke batik-bat.
Talde gaztea izanagatik, bertan azaltzen zaizkigun kide batzuk badute
mundu honetan bestelako esperientziarik. Egun beste talderen batean
murgildurik dagoenik ere bada gainera. Erakusgarririk nagusiena Aritz
Nabarro Numen ezagunen kantariak suposatzen du. Asier bateria
jotzaileak ere Odd Heathenish bizkaitarrekin aurreneko diskoa
kaleratu zuen iragan urtean.
Hasiberriak ez izate hori nabari da bai musikaren mailan. Lehen diska
izateko emaitza txukuna lortu du taldeak. Oro har, lehen aipatu bezala,
Gotebörg-eko eskolaren estandarrak betetzen dira musikan. Ahots urratuak
gehiengoan (ongi eginikoak izanagatik Numen-en distira handiagoa
daukatenak), gitarra zorrotz eta oldartuak baina betiko melodia
bereizgarriekin, eta erritmo azkar zein lasaituagoak, pasarte
akustikoren bat ahantzi gabe (diskaren tempoa ezartzeaz gain, oso
ongi ekarritako pasarteak).
Gidoi hori ongi betetzen du taldeak, eta hori puntu positibotzat hartu
behar bada ere, freskotasun apur bat faltan botatzen denik ezin uka.
Erraza da esaten eta ez seguru asko erdiesten, baina taldeari nortasun
puntu horren gabezia nabari zaio. Honek ez du esan nahi ordea kantuak
kaxkarrak direnik, ezta gutxiagorik ere; “The Seclusion (Rebellion of
the Dark Matter)” aurreneko kantua entzun besterik ez dago horretaz
jabetzeko. Sarrera akustiko dotorea, blast-beat-ak, erdibideko
erritmoak eta, batez ere, melodia sorta bikaina aurki ditzakegu bertan,
diskako abestirik eraginkorrenean. “Enveloped in the Deepest Shade of
Black” bera ere gogoratzeko erraza da, In Flames-en
hasierako lanen tankera handiagoa duena.
Orokorrean erdibideko erritmo gehiago topa ditzakegu lan honetan zehar,
“Silent End” ilunean bezala. Aurkako aldean “Drowned in
Misery” eta “In Time’s Deadline” geratzen dira, diskako
kanturik oldarkorrena berau, ahotsetan Juan Sangre (Fjörd, Ekon ohia)
-ren kolaborazia aurkezteaz gain.
Dissection
edota Naglfar bezalako taldeengandik gertuago geratzen diren
uneak ere aurki ditzakegu, “A Handful of Grief” eta “Absence
of Light” horren erakusgai. Azkeneko honek darabiltzan melodiak
dakartza batez ere gogora aipatuko taldeak, diskako beste erreferentzia
handi batean bilakatzen dena.
Ekoizpen aldetik, orekatua eta nahiko garbia bada ere, soinu
oldarkorrago bat hobeto letorkioke seguraski taldeari. Bateriari batez
ere indar falta nabari zaio. Diseinua berriz, handikeriarik gabekoa,
baina txukuna.
Jarraitu
beharreko beste talde bat dugu beraz Darkness By Oath, orain arte
gure lurretan estilo honen aldeko apustua beste inork egin ez duen
bezala burutu duena. Emaitza aldetik hutsune batzuk sumatzen badira ere
(proposamen generiko xamarra den heinean batik-bat), itxaropentsu
egoteko moduan gara. Grabatzen ari diren bigarren lanak esango digu
iragarpenok zuzenak ala okerrak diren. |
