HARD/BLUES ROCK

Konter
'Aro Berria'

Urtea: 2005 - Diskoetxea: Auto-ekoizpena / Musikherria - Taldekideak: Nikola (bateria), Jagoba (baxua eta koroak), Iker (gitarra eta koroak), Asier (gitarra eta koroak) eta Gotzon (ahots nagusia) - Ekoizlea: Paul Erdozia - Estudioa: Musikorta Estudioak (Amoroto) - Abesti kopurua: 13

2005. urtearen hondarrean Konter taldeak bere lehen diskoa kaleratu zuen. “Musikherria” zigilu berriaren babespean, Algortako mutilek “Aro Berria” estreinako lan luzea argitaratu zuten. Aldez aurretik, auto-ekoizpena bide, 4 abestiz osatutako “Konter” izeneko lehengo maketa plazaratu zuten 2002an.

Bizkaitar hauen ibilbidea 1998an hasi zenetik, gaur egun arte, taldearen musikak bilakaera nabarmena jasan du. Hala, hasierako doinu heavy-rockeroetatik, Konter metal astuna eta hardcore-punk bortitzenaren arteko erdibidean koka dezakegun musika lantzera pasa da. Erritmo bizkar-birrintzaileak, gitarra riff arras grabeak eta melodia dosi txikiekin leundutako garrasi urratu eta sakonak dira musikari hauen menua osatzen duten osagaiak.

Aro berria debutak, bada, arestiko ezaugarriak betetzen dituzten 13 abesti bortitz biltzen ditu. Une aipagarrienen artean, Neoliberalen akatsa edo Kontsumitzen gaituzte ditugu, taldearen jarrera kritiko eta iraultzailea agerraraziz. Adarra(k) jotzen (torero bueno, torero muerto!) eta Bidi, bidi, pow headbanging-a muturerra eramateko balio dezakete, eta Gure lurra itsaskorrean ostera, disko osoko gailurretako bat aurkituko dugu. Kolaborazio berezien atala irekiz, Zentzurarik ez!!! kantuan M.A.R.S. nonahikoak (Habeas Corpus) abestuko du (Nire labirintoan abestiaren hitzen sortzaile ere izan delarik). Gizakia vs. Zientzia eta G2 kantuetan NOK taldeko Leilak abestuko du, eta beste hainbeste egingo du Sucio Sistema eta NOK taldeko kide den Podri-k Gazte kantuan. Ekarpen ezberdin horiek medio, lan osoaren bataz bestekoa dezentea igotzea lortzen dutelarik.

Disko osoan zehar momentu nabarmen ezberdinak aurkituko ditugu. Izan ere, Konterek bere kartak ondo jokatu ditu. Ekarpen eta baliabide ezberdinei etekina ateratzearen ondorioz, gisa honetako metal-core eskaintzek izan dezaketen linealtasuna apurtzen jakin izan dute. “Aro Berria” lanari, horrenbestez, estreinako disko onargarri eta txukuna iritzi dakioke. Hardcore kutsuko metal doinu bortitzak atsegin dituztenentzako erreferentzia gomendagarria.

Unai S.A. (7/10)