THRASH INDUSTRIALA

            Ekaitzen baxua eta Bortxen gitarra eta programazioek osatzen zuten hasiera batean Kudai. 2002 urtea zen. Zertxobait beranduago sartu zen David, ahotsetan ikusten zuten gabezia kitatzeko. David desagertuta dagoen Bletz taldeko abeslaria da. Bere erregistroak nortasun handia du, Latzen talde mitikoko Aitorrenaren tankerakoa. Zertxobait beranduago Tito sartu zen, honela taldearen formazioa osatuz.

            Kudaik thrash industriala deritzona jorratzen du (errazago ulertzeko, sampler eta programazioak dituen thrash metala). Diskoa potente hasten da “Ni Naiz” abestiarekin. Necrotech taldeko Albertok  samplerrak sartzen ditu, eta abestiari ukitu berritzailea ematen diote. “Bidea Aukeratu” ere ildo beretik doa, hasiera hasieratik baititu programazioak (orain bai Bortx-en esku), baino hori bai, sekulako indar eta erritmoaz. “Eromena”-k samplerrak askoz lekutuagoak ditu, beraien musika elektronikaren bernizetik biluztuz, eta benetako zuzeneko aurpegia erakutsiz.

            “Bioguda” kantuak, sarrera benetan industriala badu ere, gero Kudai-ren musikaren harira jotzen du: thrash metala!! Abesti honetan ahots lan bikaina egiten du David-ek. Disko osoan egiten duen lana gogoangarria da. Batzuetan gogorra, besteetan leuna, baina beti behar den bezala abestuz. Hurrengo abestian, “Hutsa”, diskoari izena ematen diona, ez da atzera geratzen, eta gainera, Eraso! –ko Segioren laguntza du abesti borobilenetakoa osatzeko.

            “Emaidazu Argia” azkartasuna eta geldotasunaren artekoa da. Azkarra da Davidek abesten duenean, baino abiadurak kalitateari egiten dio toki gitarra punteoetan. Letra aldetik, taldearen unibertso pertsonal eta obsesiboan beste pausu bat da. “Islak” abestiak “Obsolete” garaiko Fear Factory melodikoenen kutsu sakona du ahotsetan, disko guztian zehar bezala Daviden lana aipagarri bihurtuz.

            “Fobia”-rekin diskoaren punturik altuenera iristen gara. Lan osoko abestirik azkarrena da, bateria eta baxu benetan ikusgarriekin, eta estribilo benetan itsaskor batekin. Gainera, punteoa ere ez da txantxetakoa. Abesti honengatik soilik diskoaren erosketak merezi du. Segidan, baino suabe suabe, “Kudai [v 1.0]” dator, disko honetako abesti instrumental bakarra. Hala ere, ez fidatu, zeren Kudai-rengan hain arrunta den egurra berehala txertatzen baitute. “Fobia” abestiarekin batera, diskoko abestirik onena, idazten duenaren uste xumean. Badago hortik zurrumurru bat abesti honi buruz: Bortx-ek (Hira-ko gitarrajole ohia) Hira-rentzako idatzitakoa abestia omen dela esaten duena. Nire ustez ukitu bat badu. Eta diskoari itxiera emateko, “Ni Eta Ni” dugu. Amaitzeko abesti aproposa da, Kudai-k duen nortasun propioa, thrash metala, ondo islatzen baitu.

            Laburbilduz, euskal herrian agertu den thrash industrial diskarik onena, Ekon-en debutarekin batera. Ez ezazu galdu!!!

Iñigo Otxotorena 'Jurk' (8,5/10)