DEATH/BLACK METAL

            Aurretik kaleratutako “Suffering Down” MCD-a (1999) eta “Misanthropic And Nihilist Dharma” CD digipack-ak (2002) jasotako erantzun onaren ondoren bueltan datozkigu bizkaitar hauek, 10 abestiz osatutako bigarren lan luzea dena aurkeztera: “Massive Genocide, Collective Suicide...Hurting Katharsis”. Diska Sound Source estudioetan grabatu zuten ekoizpenerako Akaitz Carrascoren laguntza izan zutelarik, eta egia esan lan bikaina burutu du Arkaitzek. Azpimarratzekoa ere diskaren aurkezpenak duen kalitatea, benetan bikaina.

            Diskari, izen bereko minutu inguruko sarrera batez ematen zaio hasiera, bat-batean, black death eraso bortitzera pasatuz bigarren abestia den “The Genesis´Eye” hastean. Abesti oso aldakor eta entzungarria, ahots guturalez abesturiko death zati pisutsuetatik black ahotsez abestutako zati black metaleroetara pasatuz, zein, ahots garbiak erabiliz ukitu gotikoa emanez, beti ere, teklatuek taldearen musikari ematen dioten freskotasuna eta atmosfera iluna azpimarratuz. Ikaragarria Ivan-ek baketekin erakusten duen teknika.  

 Hurrengo abestia, “Burn With Me”, Dimmu Borgir taldearen Mourning Palace abesti gudari ezagunaren antzera hasten da, ordea, abesti hontan kutsu death metaleroa nagusi dela esango nuke naiz eta teklatuaz eginiko orkestazio eta black ahotsa elkartzean, aurretik aipatutako talde norvegiarra gogorarazi. Benetan landuak bai ahots death metaleroa zein black ahotsa. “Heathen Roots”-en, aurreko abestiaren formula erabiltzen da, hau da, amerikar kutsua duen death-a da nagusi, baina ez dira alde batera uzten taldeak horren ongi uztartzen dituen black zatiak. Bostgarren abestian, “Old Summoners´ Announcement”, ahots garbiak garrantzia irabazten du, momentu batzutan, Borknagar bezalako taldeen antzera, black zatietatik zati melodikoetara maisuki pasatuz. Benetan abesti bikaina, gustu zein teknika ezin hobeaz egina. Abesti fresko honen ondoren diskako abesti gordinenetako bat aurkitzen da, “Bottomless”. Aston-en ahots guturala da nagusi abesti honetan, erritmo base bortitzaz eta sakonean entzuten diren teklatuen atmosfera ilunaz.

Diskaren erdialdean gaudela, erritmo baxuagoko bi abesti aurkitzen ditugu, lehenengoa, “Weird Mourners Staring At Me”,  erritmo lasaieko doom death landu batez aurkezten zaigu, momentu batzutan ahots garbiak sartuz. Bigarrena ordea, “Omitted Regrets”, ukitu gotikoago batez agertzen zaigu baina aurreko bezala, besteek ez duten lasaitasun erlatiboz aurkezten zaigu. Ahots garbi eta guturalaren arteko jokoa azpimarratzekoa da biak ere kalitate handikoak izanik.

            Ez da oso ohikoa “Okjarb (We´ll Rise Again)” abestian aurkitzen duguna. Ukitu bikingoaz agertzen zaigun abesti azkar eta potente honek, Thyrfing bezalako taldeek egiten dutena gogorarazten dit, hori bai, beraien ukitu berezia alde batera utzi gabe. Teklatuen lana abesti honetan bikaina da, eta sortzen diren orkestazioek musikari ematen dioten handitasuna ikaragarria da. Hurrengo abestia, “Ipar Haize Hotz Zuriak”, euskaraz abesturiko bakarra da, bai diska honetan eta bai taldearen historian. Bertan, J.A. Artze-ren poema batetik ateratako zati  bat abesten da. Abesti nahiko gordina, black ahotsa ia desagertuta egoteak freskotasuna kentzen diolarik. Azkenik, “A View At The Edge” abestia daukagu. Abesti oso aldakorra hau ere, death eta black ahotsak, garbiak zein narratuak, teklatu ilunak, riff heavyak, bateria baketak apurtzeko zorian, baxu linea potentea, eta azken finean, kaña, amaiera logiko bat horrelako diska batentzat.

  Esan daiteke diska bikain baten aurrean aurkitzen garela, muturreko metal edo metal extremoko edozein talderi aurpegira begiratzeko bezalako kalitatea duelarik, zalantzarik gabe. Ea zortea duten eta norbaitek aukera duin bat ematen dien.

Alberto Álvarez (9,5/10)