HEAVY/THRASH METAL

            Historiaren egutegiak 90.hamarkadaren erdialdera garamatza. Hartara, Euskal Herriko heavy metalaz ari garela “Jaiotze Basatia” (1991) edo “Hortzak Estuturik” (1992) bezalako aurrekari pisutsuak izanda esan gabe doa metal euskaldunaren hegemonia Eibar aldean kokatzen dela. Alabaina, 1996.urtean Su Ta Garren itzal luzeak “lehiakide” bat aurkitzen du: “Latzen” izeneko talde baten estreinako diskoak 12.000 aletik gora saldu eta arrakasta izugarria lortzen du oso denbora tarte laburrean. “Kontzientzia Ala Infernua” lanaz ari gara eta obra horren atzealdean Oñatiko laukote gazte bat ezkutatzen zen.

            1993an Oñatiko 4 mutil gazte elkartu ziren, beste makina bat gaztek bezala, bertsio batzuk jo eta musikaren munduan lehen pausuak emateko asmoz. Lehenbiziko kantuak konposatu ondotik, 1995.urtean Karlos Kreator-en laguntzarekin “Heriotzari Deika” izeneko lehen maketa ailegatu zen. 1996ean berriz, garai bateko adierazle bilakatuko zen “Kontzientzia Ala Infernua” diskoa argitaratu zuten. Thrash metal zantzu zenbaitekin trinkotutako metal doinu klasiko, indartsu eta melodikoak biltzen zituen lan euskaldun erabakigarria.

            Diskoa Kontzientzia ala infernua deituriko sarrera bitxiarekin hasten zen, eta oharkabean erritmo zapaltzaile batek Bat gehiago abiatze kantuari paso ematen zion. Aitorrek xuxurlatutako zubi erakargarriak eta jarraian zetorren estribillo gogoangarriak intsumisioaren aldeko aldarri borobila gauzatzen zuten. Ondoren, taldekideen euskalkiari helduz, oinarri erritmiko geldiezin batek Ze ingo xu? abesti nolabait dantzagarriagoan murgiltzen gintuen.

            “Zezenketa” deritzon ikuskizun nazkagarria ederki deskribatzen zuen hurrengo abestiaren izenburuak. Torturaren artea kantuak, alegia, flamenko kutsuko akordeak metalarekin uztartzen zituen hiltzailea heroi gisa zuten abesti hartan. Metal erasoa-k goitik beherako printzipio aldarrikapena suposatzen zuen, eta Laztana esatea metal euskaldunak sortu duen balada handi eta entzutetsuena aipatzea zen.

            Bonbo bikoitzaren lan eskerga eta metal klasikotik urruntzen ziren koru oldarkorrak Mezu hil aurretik kantuaren osagai esanguratsuenak ziren. Tarteko erritmoek aldiz, barne gogoetara bultzatzen zuten Aurkitu zaitez abestian. Pasarte akustikoak distortsio metalikoaren amorruarekin tartekatuz, Indarra entzulea asetzeko letrarik behar izaten ez duen konposizioa zen.

            Ihes-a ihes piezaren elkartasun mezuak lan honetako kantu adierazgarrienetakoa laburbiltzen zuen eta Mamuak baztertuz erritmikoki astunak agur esaten zigun thrash kutsuko riff artean.

            Atzo goizekoa dela dirudi baina aurki 10 urte beteko dira “Kontzientzia Ala Infernua” diskoa kaleratu zenetik. Gerorakoan, oñatiarrek bigarren disko bat kaleratu zuten “Ardi Larruz” (1998) izenpean. Edozelan ere, bigarren lan horrek ibilbide erakargarri bezain labur baten epilogoa sinatu zuela esan daiteke. Izan ere, handik gutxira laukote gipuzkoarra banandu egin zen. Hala, nago, ez garela gutxi izango sarritan nolabaiteko “Latzenmina” sentitzen dugunok... noraino heldu ahal izango zen Latzen taldea aurrera jarraitu izan balu? Auskalo. Baina tira, iraganean bizitzea alperrik denez, gehiago ez bada ere, tarteka-marteka bere garaian heavy metal belaunaldi berri baten lekukoa hartu zuen diskoarekin gozatzea gelditzen zaigu. Hitz batean, ezinbestekoa.

Unai Santos Amarika (05/06/21)