Lorrozoan eta itzalean. Duela lau urte hirugarren diskoa plazaratu zutenetik ez da NUMEN taldearen berririk izan. Abestiak zuzenekoetara eramateko oztopoak ez dira sekula gozoak izan Arrasatekoentzat. Taldekideen joan-etorriak gaindituta badirudi oreka topatu dutela. Gipuzkoarren myspace atarian ikus daitekeen bezala taula gainera igoko dira urtarrilaren bukaeran, Frantzian, eta otsailean Durangon dute bigarren zita. Aritz Navarrok (abeslaria) eta Lander Olazabalagak (baxua) hurrengo hilabeteetako asmoak azaldu dizkigute.

EKON
Segi zirikatzen

EKON taldeak urtarrilaren 8an iragarri zuen bueltan direla. Printzipioz zuzeneko seinalatuak eskaintzeko. Talde metal zalearen oinarria gutxi gorabehera mantenduz hainbat zaleren eskaria beteko dute. Horretarako “Zirikatzen Jarraituz 9002” prestatu dute, maiatzaren 14an abiatuko dutena Bilboko Kafe Antzokian. Ekaina bukaeran, berriz, Hatortxurock jaialdiaren 10. ekitaldian izango dira. J. Sangre taldeko abeslariarekin esklusiban hitz egiteko parada izan dugu. “Hartu sprayak eta irten kalera, hemen da Ekonekin batera, mila koloredun gerra!”

ASGARTH
Basamortuan garrasika

Paradisutik oinezkoen lurrera. Ustekabeko oihartzun entzutetsuak paretarekin topo egin zuen. Alabaina, taldekoak ez ziren mututu. “III” izeneko lana 2002an atera ondotik, lanean jarraitu zuten isiltasuna gordez. Orain, ahaztuak izateko arriskua alboratu asmoz “... Garrasia” izeneko diskoa argitaratu dute. Dagoeneko, Añorgako mutilen laugarrena da. Lan rockeroagoa, zaindua, heldua eta aldaketez josia dagoena. Honela, Asgarth-en ibilbide bereziaz eta disko berriaz gehiago jakiteko eurekin izan ginen.

MATERIA
Hamar urteko zama iraunkorra

Urnietan bada hirukote bat. Materia da beraien izena. Ondo moldatzen dira musika egiterako garaian. Doinu gogorrak pasarte lasaiekin nahastea gustuko dute. Materia da beraien izena. Martxoan “Autodestrucción” (Fragment Music) izeneko laugarren diskoa atera zuten. Laugarrena bai. Perfektua. Urteak eman duen lehen fruitu bereizgarria. Materia da beraien izena eta bada garaia beren musika goraipatzeko. Merezi dute. Jon gitarra jotzaileak zer edo zer kontatu zigun.

ANESTESIA
Sendabidea

Sei urte lozorroan eman ostean, Beloki, Ibon, Dani eta Mikelek osatutako ANESTESIA bueltan da. Doinu berriekin, zenbait aldaketekin eta begiak irekitzeko prest. Itzuleraren zati dugu “Terapia” izeneko bosgarren lana. Ibilbide baten jarraipena, etenak horren sakonak izan ez direnean. Disko berria, Bonberenea Ekintzak zigiluaren ohatilan atera da ebakuntza gelatik. Sendo gainera, metal doinuen indarra inoiz baino presenteago dago-eta. Itzartze honen haritik, Mikel Kazalis musikari anonimoarekin hitz egin genuen.