Paradisutik oinezkoen lurrera. Ustekabeko oihartzun entzutetsuak paretarekin topo egin zuen. Alabaina, taldekoak ez ziren mututu. “III” izeneko lana 2002an atera ondotik, lanean jarraitu zuten isiltasuna gordez. Orain, ahaztuak izateko arriskua alboratu asmoz “... Garrasia” izeneko diskoa argitaratu dute. Dagoeneko, Añorgako mutilen laugarrena da. Lan rockeroagoa, zaindua, heldua eta aldaketez josia dagoena. Honela, Asgarth-en ibilbide bereziaz eta disko berriaz gehiago jakiteko eurekin izan ginen.

 
Zuen izenak gorantz egin bezalaxe, beherantz ere egin zuen. Zer gertatu zen arrakasta egoeratik isiltasunera igarotzeko?
Egia esan arrakasta urte horien ondorio izan zela uste dugu. Bigarren diskoarekin Euskal Herriko ia bazter guztietan jo genuen eta herri horietan errepikatzea, denbora laburrean, zaila izaten da. Generaman erritmoa zaila da mantentzea. Gainera gure lurraldea oso txikia da eta segituan lekuak errepikatzen hasten zara. Dena den, emandako kontzertu gutxi horietan harrera ona izan genuen eta horrekin gelditzen gara.

Argi dago, “fama” ustekabean etorri zitzaizuela. Nola asimilatzen duzue orain, bere garaian izan zenuten “momentuko arrakasta” delakoa?
Nolabaiteko arrakasta izatea lortu genuen jendeari taldea eta gure musika gustatu zitzaiolako. Jende aurrean izateari utzi diogunean ohartu gara benetan gertatutakoaz. Hasierako garai horietan hodei batean bezala geunden, ez genuen gelditzeko astirik ere. Astero geneukan kontzertua eta jendeak kalean gu ezagutzea, arrunta bilakatu zen. Dena azkarregi igaro zen konturatu ahal izateko.

Bestalde, hirugarren disko hartatik egun bitarte denbora igaro da. Nola laburbilduko zenituzkete azken hiru urteak?
Ondorengo hilabeteak lasaiak izan ziren, lasaiegiak agian. Baina taldean emandako aldaketa batzuei esker, lokalean sartu eta lanari gogor ekin genion, bai aurreko abestiak joaz, baita berriak sortuz ere. Honela, itzalean egindako lana handia izan da eta halaxe igaro ditugu azken ia bi urteak.

Orain, “... Garrasia” izeneko laugarren diskoa kaleratzea lortu duzue. Egia esan, “lortu” duzuela esan genezake, bide zaila izan delako. Deskriba ezazue diskoaren prestatze prozesua?
Esan bezala, isilean egindako lana handia izan da. Batez ere azken bi urte hauetan. Horrela bada, abuztuaren 15ean Sonido XXI estudiora abiatu ginen gure abestiak grabatzeko asmoz. Grabaketa oso ondo joan zen, baina Gor diskoetxearekin ez genuen akordiorik lortu. Hau dela eta, zigilu ezberdinekin kontaktuan jarri ginen eta EDG music izan zen guregatik apustu indartsuena egin eta gure proiektuan gehien sinistu zuena. Azken finean hori da bilatzen genuena; norbait gure proiektuan guk adina sinesten zuena.

Zergatik “... Garrasia”?
Garrasi bat gauza eta egoera ezberdin askoren sinbolo edo isla izan daiteke: poza, beldurra, mina, haserrea, gozapena, askatasuna, ... Gure diskoa osotasunean batzen zuen hitz aproposena zela iruditu zitzaigun.

Aurreratu duzuen bezala, aldaketen diskoa izan dela esan genezake. Diskoetxea aldatzeaz gain, bateri jole berria sartu da taldean. Aurkeztu bere burua.
Bateria jotzaile berriak, Unai Corral du izena eta aurretik Utikan taldean aritutakoa da. Utikan taldearekin lotura handia izan dugu beti, Añorgakoak izateaz gain, gure entsegu lokal berean elkartzen ziren. Gure anaia zaharrak bezala dira. Gauzak honela, Unairi ea heavy pixka bat egiteko prest zegoen galdetu eta “baietz” esan zigun.

Eta dirudienez, Unairen sarrerak eragina izan du taldearen garapenean. Disko berria harretaz entzunez gero, soinu hard rockeroagoa atzeman daiteke abestietan.
Egia esan, zerikusi handia izan du. Unai nahiz eta heavya gustuko izan rockzalea da eta modu batean taldea aberastu egin du. Erritmo berriak ekarri ditu eta honek abestiak egiteko bide berriak ireki dizkigu. “... Garrasia” diskoan abestiak Hard Rock kutsua irabazi dutela esan daiteke, eta hori da pixka bat bilatu nahi izan duguna.

Musikarekin jarraituz, 12 kantu berri (intro eta outroa alde batera utzita) entzun ditzakegu lan berrian. Baliteke, Asgarth taldearen kanturik helduenak izatea. Hitz egin ezazue apur bat abestietaz?
Lan berri honetako abestiak bi multzotan banatzen dira. Batetik, “Asgarth” soinua duten abestiak daude, heavyak, azkarrak, biziak eta gelditzen diren horietakoak. Esaterako, “Azken Nahia”, “Esnatu Gara” eta “Zuzenean”. Bestetik, Hard Rock kutsua dutenak daude. Adibidez, “Zeren Beldur”, "Ahaztezina Izango Dela" eta "Gezurrak". Esan bezala, 2 urtez aritu gara abesti hauek prestatzen eta emaitzan nabari da; abestiak kontu handiz landuak izan dira eta hemendik Asgarthen abesti borobilenak jaio dira. 

Grabaketak, “III” lanaren esperientzia errepikatu asmoz Sonido XXI estudioetan burutu dituzue. Gustura berriz ere beraiekin lan egiteaz?
Sonido XXI estudioan grabatu nahi genuela argi geneukan; aurreko diskoarekin oso gustura gelditu ginelako. Gainera San Martin anaiek ondo ezagutzen gaituzte eta nahi duguna bilatzen laguntzen digute. Hori ondoren emaitzan islatu da.

Epe motz eta luzera begira zein asmo dituzue?
Gure asmoa kontzertuak Euskal Herriko bazter guztietan ematea da. Hasteko, aurkezpen kontzertuak ematen hasiko gara. Honela, abenduaren 16an Ondarruko Kafe Antzokian, urtarrilaren 12an Bilboko Kafe Antzokian eta bi egun beranduago Tolosako Bonberenea gaztetxean eskainiko dugu kontzertua.

Amaitzeko, zein da Asgarth taldearen ilusioa eta nola ikusten dituzue gauzak gaur egun? 
Ilusio ikaragarriarekin aurkitzen gara. Hasiera batean, dena zen berria, orain ordea, badakigu zer den jende aurrean egotea eta hauek zure abestiak kantatzen ikustea. Hori oso handia da. Guk gure esku dagoen guztia jarriko dugu, beti bezala topera!

*Oharra: Iaz (2006) Entzun! aldizkarian argitaratutako elkarrizketa. Agurra dela-eta berreskuratu dugu.

 

Iñaki Esnaola (07/09/02)