|
Horren azkar lehen lana kaleratzea
pozgarria behar du izan ezta?
Bai, beti ere norberaren lana
ezagutzera ematea gauza polita da. Diskoa urtarrilean grabatua
dago, maketa grabatu genuen leku berean, Ondarroako Santos
Records estudioetan. Hasiera batean, Oihukarekin data horietan
kaleratu asmoz ibili ginen, hala ere gauza bategatik edo beste
bategatik atzeratu egin da. Zain egon beharra izan dugu, baina
taldean ere aldaketaren bat izan da eta guztioi ondo etorri
zaigu. Oso pozik gaude.
Taldea berria izanik
nahiz eta aurpegi ezagun bat izan, nola laburbildu liteke UNEren
orain arteko bidaia?
UNE denborarekin forma hartzen joan
den taldea da, jende ezberdina pasa da bertatik eta guztiek
zerbait utzi dute. Hala ere, 2005 urte hasierarako, taldearen
musika finkatu zela esan daiteke. Diskoan parte hartu dute eta
taldekide izan dira Ruben (Apnea…), Jaime (Psychophony, Afrika,
Urgabe…) eta hainbat talderentzat lanak eginda dagoen Gaizka (Sorkun,
Etsaiak…).
Eta zeintzuk osatzen duzue taldea?
Nahiz eta taldearen
ardatza bere horretan segi, Ruben-ek (gitarra) Bartzelonan soinu
ikasketak egitea eta Jaimek (baxua) Madrilen abentura musikal
berria burutzea erabaki zuten. Jaimeren ordez baxuan “Melows” (Bulldozer,
Zurkaitz, PiLT-en
ordezko gisa ibilia...) eta UNE laukote bilakatu zen. Rober
Garzia (gitarra), Xabi Oraa de Zumarraga (bateria), Karmelo
Aretxaga “Melows” (baxua) eta Aitor Uriarte (ahotsa).
Zer esan nahi du “Une Nare Eza”
terminoak?
Guztia hain azkar doakigun gizarte
honetan, askotan norberarentzako uneak ere beharrezkoak izan ohi
dira. Ihesbideak musikarekin edo lagun artean aurkitu ohi ditugu
eta horrela islatu nahi izan dugu taldearen izenean:
UNE = Une Nare Eza
(beste era batera esanda: momentu trankilen falta).
Bestalde, azken hilabeteetan
grabatu dituzuen bi bideoklipekin taldea ezagun bilakatu duzue.
Zer dela eta bideoklipei emandako garrantzia?
Horrela suertatu da. Apirilean
“Bihozkadak” kantua aurkeztean Oihukako Juanmaren bitartez
bideoklip bat grabatzeko aukera eskaini ziguten eta bi aldiz
pentsatu gabe onartu genuen; diskoan joango den CD Rom ikusgarri
bat ere egin dute. Hala ere, taldeak bideoklip bat genuen buruan
eta abuztuan “Hemen” kantuaren bideoklipa grabatu dugu Bilboko
Santana 27 aretoan jendearen aurrean, giro polita izan zen
bertan.
Merkatuan agertzeko aukera Oihuka
diskoetxe ezagunak eman dizue. Latzen taldearekin ere antzerako
gauza bat gertatu zen. Nahiz eta zenbait ezberdintasun egon.
Latzenek lortu zuen arrakasta lortzerik?
Bai, badirudi Oihukak Latzenekin
asmatu zuela. Euskal Herriko rockaren mundua aldatu den arren,
oraindik diskoetxeek xede berdina dutela pentsatzen dut.
Nolanahi ere, Arrakasta guztiontzat ezberdina izan daiteke.
Guretzat arrakasta kontzertu batean ondo egitea edota norberan
diskoa entzutean arro sentitzean datza, baina normalean,
azkenean, era batera edo bestera dena lotuta doa.
Lehenik
Latzenekin egin zenuen aurrera.
Ondoren taldea banandu eta Sen
taldea osatu zenuen. Aldaketa nabarmena. Orain iraganeko bi
taldeen hibrido batean barneratu zarela esan daiteke. Nola
ikusten duzu zuk?
Bai, ados nago. Latzen eta Sen-ek
ez zuten inolako antzik eta biek betetzen ninduten. Hala ere,
Sen-ekin, batzutan erregistro batzuk faltan botatzen nituen eta
alde horretatik UNE-k ahotsarekin joku gehiago ematen dit. Behar
bada, Sen pop-rock kontenitua zen eta UNE pop-rock askeagoa
Metal puntu batekin. Gainera kontzertuetarako gitarra ere alde
batera utzi dut eta askeago sentitzen naiz.
Metal doinuetatik pop rockera.
Orain berriz ere doinu gogorretara. Tximak beti luzatzen dira
ala?
Sen taldearen garaian ere barrenean
Heavy bat nintzela esaten zidaten txantxetan eta behar bada
horrela izango zen (barreak)
Diskoan barneratuz, zenbat abesti
ditu eta zer aurki daiteke kantu horietan?
Hamaika kantu eta apur bat denetik.
Kantuen denboratan ez dago aldaketa handirik, baina kantu
suabeagoak eta gogorragoak aurki ditzakegu. Adibidez, orain
aurkeztuko dugun bigarren aurrerapena “Hemen”, “Bihozkadak”
lehenengo aurrerapenarekin alderatuz, gordinagoa da,
kontzertuetan disfrutatzen diren horietakoa, kantu sakonagoak
ere badira.
Zuk idatzi dituzu abestien hitzak.
Zein mezu helarazi nahi izan duzu?
Normalean musika entzunez gairen
bat etortzen zait burura, gehienetan momentuan bizi ditudan
kezkak, ikuspuntuak… baina fikziozko pasarteak ere idazten ditut
buruan.
Musikalki, aurrerago aipatu bezala
rocka eta metalaren arteko zubian koka daiteke UNE. Azkenaldian
dezente hedatu den musika da. Doinu sendoak eta paisaia zein
ahots melodiakoak. Formula gustagarria?
Gustagarria ez dakit, baina niri
gustatzen zait. Egia esan, ez dut horrelako musika asko jarraitu
eta aspaldiko laguna dudan Xabi taldeko bateriaren bitartez
musika hau gehiago ezagutu dut. Bizitzako edo eguneko momentu
bakoitzean joera musikal jakin bat izan dezakegu, baina niri,
ona bada edo iristen bazait, edozein musika gustatu ahal zait.
Abestiko kantuekin batera
aipaturiko bi bideoklipak gehitu dituzue. Beti ere musika baina
zerbait gehiago eskaintzearen alde?
Kontzertuetan bai, diskoan horrela
suertatu da. Hala ere, euskarri berean taldeari buruz zenbat eta
gehiago eman beti hobeto, ez? Diskoan, musikaz gain CD Rom bat
joango da “Bihozkadak” bideokliparekin, taldearen argazkiak…
“Hemen” bideoklipa beste gauza batzuekin batera UNEren web
orrian aurkitu ahal izango da laster jadanik martxan den
www.unekin.com
helbidean.
Diskoa kaleratu ahala zeintzuk dira
taldearen helburu nagusiak?
Taldearen musika zuzenean
jendaurrean erakustea.
Aurrera begira ibilbideari segida
emateko asmoa?
Unean UNE.
*Oharra:
Entzun!
aldizkarian argitaratutako
elkarrizketa.
|
