Bizkaitarrak eta amorruz beterikoak. Honako definizioa, zuzenena litzake Konter taldea aurkezteko. Metal doinuak lagun, boskote honek “Aro Berria” izeneko lehen diskoa kaleratu zuen, iaz Durangoko Azokan. Musikherria ekimen berriaren berrikuntzetako bat izan zen. Hau da, autoekoizpenaren bidea posible dela adierazten duen beste eredu bat. Sufrituta kaleratu zuten diskoaz zerbait gehiago jakiteko,  Gotzon abeslariarekin izan ginen.

Lehenik eta behin, laburtu ezazue Konter taldearen orain arteko ibilbidea?
Ibilbide nahiko korapilatsua izan dugu. Hasierako formaziotik bakarrik Iker gelditzen da. Estiloari dagokionez aldaketa nabarmenak izan ditugu, heavy metal doinuetatik doinu astun eta gogorrenetara pasa gara. 2001. urtean maketa bat grabatu genuen 4 abestiz osatutarikoa, eta oraintsu kaleratutako diskoaren aurrekari bakarra litzake. Bestalde, urte hauetan 50 kontzertu inguru eman ditugu eta Euskal Herriko txoko asko ezagutzeko aukera eman digu taldeak. Orain ostera gure lehen lan luzea aurkezten gabiltza.

Iaz, “Aro Berria” izeneko lehen diskoa aurkeztu zenuten Durangoko Azokan. Nolakoa izan zen prestaketa prozesua?
Abestiak hilabete batzuk prestatzen egon ondoren, 2004ko abenduan estudioan sartu ginen. Bi hilabete eraman gintuen grabaketak eta nahasketak. Hurrengo hilabeteetan arazo ezberdinengatik (badakizue lan merkatua zelan dagoen gaur egun) geldirik egon ginen. Uda ostean berriz ekin genion diskaren maketazio eta edizioari. Horrela 2005 abenduan kaleratu genuen gure lehenengo diska.

Esan bezala, “Aro Berria” izenburuarekin bataiatu duzue zuen lehenengo haurra. Zeren aro berria aldarrikatzen duzue?
Aro berria izenburuarekin bi gauz aldarrikatu nahi izan ditugu, alde batetik geure taldeko bizitzan egon diren gora beherak eta beste aldetik gaur egungo gizarteak daraman ibilbide teknologikoa, honekin gizakiak teknologia eta zientziarekiko daukan menpekotasuna kritikatzen saiatzen gara.

Zer aurkituko dugu lehen lan honetan?
Riff gogorrak, erritmo astunak eta azkarrak nahastutak eta gure izaera markatzen duen ahots urratu eta guturala.

Kolaborazio interesgarriak izan dituzue.
Halaxe da. Alde batetik, MARS (Habeas Corpus), aurretik ezagutzen genuen eta gustora aurkitu zen guk planteatutako ideiekin, gainera abesti baten hitzak berak egin zigun. Laila eta Podri (Nok), estudioan bertan ezagutu genituen eta naturalki atera zen beraien aportazioa.

Musikalki, metal eta hardcorearen artean koka genezake Konter taldea. Doinu gogorrak lantzen dituzten zein talde dituzue gogokoen?
Taldeko kide bakoitzak bere preferentziak ditu, Euskal Herriko taldeetatik (Anestesia, Parasma, Etsaiak, Brutal melody…), atzerriko talde gogorrenetararte (Sepultura, The Haunted, ...).

Bestalde, Musikherria herri diskoetxearen barnean zaudete eta beraiekin kaleratu duzue diskoa. Zer du Musikherriak zuek bertan egoteko?
Musikherrian sartu ginen beraien printzipioekin bat egiten genuelako. Euskal Herriko talde askoren elkarlanaren emaitza da, inor ez da inor baino gehiago ez gutxiago. Gainera uste dugu gaur egun autogestioa dela biderik egokiena gu bezalako taldeentzat.

Euskal musika aro berri batean murgildurik dago, edo oraindik iraganeko oroitzapen asko ditugu?
Bai, edozein tabernetan edo jaietan joaten zarenean betiko kantuak eta betiko taldeak entzuten ditugu. Badirudi oraindik ez dugula gainditu 80ko hamarkadaren “boom” hori. Euskal musika genero gehiagoetara zabaldu behar dela uste dugu.

Amaitzeko, aurrera begira zein asmo dituzue?
Orain zuzeneko asko ematen ari gara eta horrela jarraitzea espero dugu urte amaierararte, diska herriz-herri aurkeztuz. Hori egin ostean, bigarren diskaren grabaketarekin hastea espero dugu.

*Oharra: Entzun! aldizkarian argitaratutako elkarrizketa.

Iñaki Esnaola (06/05/16)