[ IBILBIDEA - TRAYECTORIA ]

Metal musika oinarri duen saio honek 2001. urtean eskaini zuen lehendabiziko saioa. Aukera, Donostiako Ttan Ttakun irrati aske eta euskaldunak (106.8 FM) eman zion eta egun ere irratsaioaren etxe izaten jarraitzen du. Hasierako urteetan Jon eta Inaxio aritu ziren Burdinola astero aurrera eramaten. Urteen joan etorrian saioa makina bat aldiz moldatu zuten, beti ere rock gogorra eta heavy metala ardatz izanik. 2002. urtean Jonek saioa uztea erabaki eta Inaxiok hartu zuen ardura. Ordutik hona nazioarte zein Euskal Herriko metal talde askoren musika entzun ahal izan da Burdinola irratsaioan. Baita hainbat elkarrizketa ere. 2007ko irailetik, Info 7 irrati nazionalean ere entzun daiteke programa.

Gaur egun, Burdinola saioak Ttan Ttakun irrati askean jarraitzen du egitura aldaketa nabarmen batekin eta beti bezala metal musikaren alde eginez. Izan ere, musika estilo honek oraindik ere baditu jarraitzaile dezente baina leku gutxi du medioetan. Honekin batera, heavy metala euskaraz ere goza daitekeela erakutsi nahi du Burdinola irratsaioak.