Ez da oso ohikoa plazaratu gabe dagoen disko baten aurkezpena egitea. Are gutxiago, disko hori gutxi batzuk entzun dutenean. Arrazoi asko bila genitzake azalpen egoki bat lortzeko, baina tristeenarekin egiten dugu topo: diskoetxeak bere hitza ez betetzea. Arrazoi hau, aski ongi barneratu behar izan du Beforce talde bizkaitarrak. Hasiera batean, “Creation” lehen lan amestua 2004ko urte amaieran plazaratuko zela esan zieten. Ez zen hala gertatu. Ondoren, aurtengo otsailean kaleratuko zela sinestarazi zieten. Boskoteak ez zuen sinetsi. Diskoa kaleratzen ez zela ikusita, zalantza ugari izan zituzten aurkezpen kontzertua burutzeko. Azkenik, egitea erabaki zuten (aretoarekin data hitzartua zutelako).

            Egun hura otsailaren 19a izan zen. Larunbat euritsua eta hezea, baina ez hotza. Bederatzietarako, Bilborock aretoaren kanpoaldea zaletuz betea zegoen. Batetik, Beforce taldea ikustera zetozenak zeuden (gehiengoa), eta bestetik, Bulletnoise talde gonbidatua bultzatzera zetozen jarraitzaile sutsuak. Minutu batzuk igaro ondoren, ateak zabaldu eta berotasuna aretoan barneratu zen. Denera, 250 pertsona inguru bildu ziren La Merced eliza ohian, jende kopuru bikaina talde protagonistaren irribarrea eragiteko.

            Kontzertuen hasiera gaueko 20.30etarako iragarrita baldin bazegoen ere, 21:15ak inguru izan ziren Bulletnoise-ko mutilak taula gainera igo zirenean. Boskote gazteak eszenatokia zapaldu bezain laster, Bilborock aretoan nu metal doinuak gailendu ziren. Bulletnoisek, halere, Limp Bizkit eta enparauek lantzen duten rap-metal entzutetsutik aldenduz, doinu oldarkorragoen aldeko apustua egiten du. Honela, Slipknot edo Chimaira bezalako taldeen eragin argiak erakutsiz, ahots garbi eta agresiboen uztarketa, erritmo aldaketa bortitzak eta azken belaunaldiko metal riff ugari biltzen zituen emanaldia eskaini zuten. Egia esan, ezer berririk ez. Azken urteetan asko hedatu den formulari jarraituz, aldez aurretik aurreikus daitezkeen doinu elebidunak (euskara eta gaztelera tartekatuz) landu zituen talde bizkaitarrak.

            Han entzun genituen bata bestearen atzetik, “Uno”, “Lucha”, “Egun Batean”, “Soft” edo “El Fin De La Esencia” bezalako kantuak. Jo zituzten bertsioen artean, Lynyrd Skynyrd taldearen “Sweet Home Alabama” abesti ospetsuaren moldaketa instrumental laburra, eta Berri Txarrak nafarren “Ikasten” kantua nabarmendu genitzake (azken hau, gehiago landu beharreko bertsioa; egiazki, eskas xamar atera baitzitzaien)

            Edonola ere, Bulletnoisekoak nahiko ondo moldatu zirela esan beharra dago. Espresuki Bulletnoise ikustera hurbildu zen jarraitzaile multzoaren sostengua zela medio, “bala hotsaren” mutilak oholtza gainean eroso eta gustura aritu ziren.

            Etenaldi labur baten ostean, gaueko protagonisten taularatzea segundo gutxiko gauza izan zen. 22:30ak inguru zirenean, Beforce boskotea jendearen txalo zaparradarekin batera igo zen oholtza gainera. Musikari bakoitza zegokion lekuan jarri ondoren, kontzertuetan erabili ohi duten Intro edo “Sarrera doinua” entzun zen aretoan. Zalentuen ikuskizun nahia areagotuz joan zen, eta zenbait gizaseme aurrealdea konkistatu nahian zebiltzala, “Thank You Mountains” abestia jotzen hasi ziren. Askok harriduraz hartu zuten sarrera, ez zuten uste taldearen kantu luzeenarekin hasiko zirenik. Hala ere, zaletuen erantzuna ez zen nolanahikoa izan. Boskotearen maisutasuna ere agerian geratu zen, txukun burutu zutelako atariko froga. Honekin batera, Dani abeslariaren gaitasuna azpimarratu beharrekoa da, bai ingelesez eta bai euskaraz abesten bikain moldatu zelako (ea noizko euskara hutsezko kantua). Ahotsa bera ere da ahuntzaren gauerdiko eztula (esaera zahar egokia, ezta?).

            Hurrengo bi abestietan, Beforcen power metalak ez zuen atsedenik izan. “Genesis” abesti ezaguna jo zuten lehenik. Zaletuek bikain erantzun zuten talde bilbotarraren abesti zaharrenaren aurrean. Ondoren, Dann gitarra jotzailearen punteo batek “Wrong Way” kantua bideratu zuen. Bilbotarrek, abestiaren azkartasuna eta estribilloaren melodia oso ondo uztartu zituzten, eta bide batez, bertaratu zirenen gorputzak berotzeko baliagarria izan zen. Azpimarragarria Renato bateri jotzailearen indarra eta ‘emozioa’. Bi kantu hauen ondotik, abesti lasaixeago baten txanda iritsi zen: “Beauty In Darkness”. Lehen laneko kantu pausatuena, jarraian zetorrenaren ‘parentesi’ modukoa izan zen. Hain zuzen ere, Dani abeslaria oholtzatik desagertzearekin batera, Dann bakarrik utzi zuten jendaurrean. Honela, “Alone With The Dann” instrumentalari ekin zion gitarra joleak. Beste behin ere, zaletuak sor eta lor geratu ziren gaztearen abilezia ikusita. Egia esan, onena ez den arren, ona dela ezin uka. Instrumentalaren ondotik, power metal zaleen lerdeak gainezka egin zuen. Arrazoia, Helloween taldearen “Eagle Fly Free” kantuaren bertsioa izan zen. Egia esan, jatorrizkoaren antza handia izan arren, ongi jo zutela onartu behar da.

            Lehenengo atsedenaldira iritsi aurrez, “Wake Up” abestiaren garaia iritsi zen. Diskoko abesti sendoena gitarrei dagokionean eta death melodikoaren zantzuak dituena. Gainera, aipagarri da Torro (Konter, Odd Heathenish) abeslariaren parte hartzea diskoan, zuzenean ez ordea. Hau dela eta, kantuak indarra galtzen du zuzenean.

            Kontzertuaren bigarren txanpa, “Creation” diskoari sarrera ematen dion sarrera doinua “Riding’Neath The Rain” kantuarekin uztartuz hasi zuten. Boskotearen lehen bideoklipa bilakatu den abestia, emozioz hartu zuten zaletuek. Hala ere, gaueko abesti makalena izan zela esan behar da: soinu arazo gehiegi. Atsedenik hartu gabe, “Void” eta Su Ta Gar taldearen “Mari” bertsioarekin jarraitu zuten. Gaueko bigarren bertsioa, jatorrizkoa gainditu ez zuen arren (ezinezkoa) txukun jo zuten. Hori bai, ezin uka daiteke Gorosabel jaunak Daniren gaztetasuna eta ahotsa eduki nahiko lukeela. Bigarren abesti multzoa amaituta, taldekideak kamerinoetara joan ziren Dann gitarra jolea oholtza gainean utzita. Gazteak gitarrari hitz eginarazten jardun zuen minutu batzuetan. Bitarte horretan, makina bat solo ezberdin entzuteko aukera eman zien bertaratu zirenei. Asko gazteari begira geratu ziren erabat harrituta, beste batzuk ostera aspertu aurpegia jarri zuten.  

            Atsedenetik bueltan, aurkezpenari amaiera emateko azken bi kantuak jo zituzten. Lehenik, Judas Priest taldearen “The Sentinel” kantua jo zuten (gaueko hirugarren bertsioa). Zaletuen emozioak puntu gorenera iritsi eta gaueko une beroena bizi izan zen. Alabaina, gaueko bertsio makalena izan zen. Bigarrenik eta aurkezpenari amaiera emanez, “Outsider For The Nature” abesti bikaina jo zuten. Azken honetan ere, bost musikariak oso ondo aritu ziren, Beforcen kontzertuak hasi eta bukatu arte indartsuak direla erakutsiz.

            Laburbilduz, bizkaitarrek “Creation” lanaren aurkezpena ondo burutu zuten, agerian utziz euren power metal doinuek freskotasun eta indarra dutela. Taldea oso ondo moldatu zen oholtza gainean eta horrexegatik txalotzekoa da Dani, Dann, Ignacio, Iñigo eta Renatok emandako ikuskizuna. Akats bezala, soinuaren kalitatea genuke. Beste batzuetan bezala, kontzertuan zehar hainbat soinu arazo izan zituzten. Hala ere, Beforce taldearen esentzia bete-betean jaso zuten gerturatu zirenek. Ezbairik gabe, zaletuen aurkezpena izan zen. (05/04/18)